Абмежаванне на наведванне пагранічнай паласы ў Гомельскай вобласці прадоўжылі да 1 снежня

30 жніўня, Мінск /Кар. БЕЛТА/. Абмежаванне на наведванне пагранічнай паласы ў Гомельскай вобласці прадоўжылі да 1 снежня. Аб гэтым БЕЛТА паведамілі ў Дзяржаўным пагранічным камітэце.

У Дзяржпагранкамітэце расказалі, што для забеспячэння пагранічнай бяспекі з 1 чэрвеня па 31 жніўня 2022 года дзейнічаюць часовыя абмежаванні ўезду (уваходу), часовага знаходжання грамадзян у пагранічнай паласе на тэрыторыі Брагінскага, Лоеўскага і Хойніцкага раёнаў Гомельскай вобласці. Дзеянне гэтых абмежаванняў вырашана прадоўжыць з 1 верасня па 1 снежня бягучага года.

У ведамстве падкрэслілі, што абмежаванні не распаўсюджваюцца на ўласнікаў зямельных участкаў, асоб, якія выконваюць працоўныя (службовыя) абавязкі, а таксама ўдзельнічаюць у мерапрыемствах па ахове Дзяржаўнай граніцы на названай тэрыторыі. Таксама ў гэты перыяд прыпыняецца выдача пропускаў у пагранічную паласу на тэрыторыі Брагінскага, Лоеўскага і Хойніцкага раёнаў Гомельскай вобласці.

Межы пагранічнай паласы можна знайсці на публічнай кадастравай карце Беларусі.-0-

Навіны Беларусі (БЕЛТА)