Навіны рэспублікі

Урад зацвердзіў план мерапрыемстваў па правядзенні Года народнага адзінства

Мінск /Кар. БЕЛТА/. Урад Беларусі зацвердзіў рэспубліканскі план мерапрыемстваў па правядзенні Года народнага адзінства. Гэта прадугледжана пастановай Савета Міністраў ад 2 лютага нумар 64, паведамілі карэспандэнту БЕЛТА ў прэс-службе беларускага ўрада.
У спіс мерапрыемстваў уключылі 106 пунктаў. Сярод іх - рэалізацыя рашэнняў VI Усебеларускага народнага сходу, правядзенне мерапрыемстваў, прымеркаваных да знакавых падзей у гісторыі Беларусі і маючых асаблівае гістарычнае і грамадска-палітычнае значэнне (Дзень Канстытуцыі 15 сакавіка, Свята працы 1 мая, Дзень Перамогі 9 мая, Дзень Дзяржаўнага герба і Дзяржаўнага сцяга 9 мая, Дзень усенароднай памяці ахвяр Вялікай Айчыннай вайны 22 чэрвеня, Дзень Незалежнасці 3 ліпеня і інш.), аўтамотавелапрабег, прысвечаны Году народнага адзінства.
Да 1 сакавіка прапрацуюць пытанне аб устанаўленні ў Беларусі дзяржаўнага свята - Дня народнага адзінства. Будзе падрыхтаваны праект закона, накіраванага на процідзеянне рэабілітацыі нацызму, гераізацыі нацысцкіх злачынцаў і іх памагатых.
У планах стварэнне інфармрэсурсу "Народная згода" і Telegram-канала, прысвечанага Году народнага адзінства, правядзенне сацыялагічных даследаванняў "Народнае адзінства як фактар умацавання беларускай дзяржавы". Чыноўнікі хочуць актыўней знаёміць моладзь з дасягненнямі Беларусі ў сацыяльна-эканамічнай, навуковай, спартыўнай, культурнай сферах. Для гэтага арганізуюць сустрэчы, канферэнцыі, інтэрнэт-форумы з удзелам прадстаўнікоў органаў дзяржаўнага кіравання, работнікаў розных галін эканомікі і сацыяльнай сферы, ветэранаў вайны і працы. Будуць распрацаваны метадычныя рэкамендацыі для ўстаноў адукацыі па фарміраванні ведаў і паважлівага стаўлення да дзяржаўных сімвалаў Беларусі.
Запланавана ўсебеларуская маладзёжная экспедыцыя "Маршрутамі памяці. Маршрутамі адзінства", рэспубліканскія конкурсы сярод моладзі на лепшыя медыярэсурсы патрыятычнай тэматыкі, праект "Гродна - маладзёжная сталіца Рэспублікі Беларусь 2021", інфармацыйна-адукацыйны праект "ШАГ", нацыянальны дзіцячы форум "Беларусь - краіна магчымасцей!", правядзенне ваенна-патрыятычных лагераў для моладзі. Улады таксама хочуць павысіць прававую дасведчанасць і прававую культуру дзяцей і моладзі.
У час валанцёрскіх акцый будуць дапамагаць адзінокім ветэранам, інвалідам, пажылым грамадзянам, дапамогу павінны атрымаць тыя, хто мае патрэбу ў дарагім лячэнні.
У пералік мерапрыемстваў уключаны работа дыялогавых пляцовак, круглых сталоў, адкрытыя дыялогі з удзелам прадстаўнікоў зарэгістраваных грамадскіх арганізацый і палітычных партый па актуальных пытаннях развіцця краіны і рэгіёнаў, стварэнне саветаў старэйшын пры мясцовых выканаўчых і распарадчых органах. Запланаваны сустрэчы з вядомымі людзьмі, якія нарадзіліся ў вобласці, раёне і сталі вядомымі людзьмі Беларусі, аб'яднаныя ў цыкл "Жыццё на карысць Радзімы".
Сярод мерапрыемстваў таксама круглы стол "Стварэнне беларускамоўнай заканадаўчай базы як фактар гарманічнага развіцця грамадства" і правядзенне мерапрыемстваў, прымеркаваных да Міжнароднага дня роднай мовы.
У плане прапісана ўзаемадзеянне з прадстаўнікамі рэлігійных канфесій па фарміраванні ў грамадстве нецярпімасці да праяў экстрэмізму, нацызму і ўсіх форм насілля, правядзенне ўсебеларускай малітвы "За Беларусь!".
Урад хоча выкарыстаць патэнцыял прадстаўнікоў беларускай дыяспары і грамадзян замежных краін у развіцці двухбаковых адносін у гандлёва-эканамічнай і гуманітарнай сферах, процідзеянні дэзынфармацыйным кампаніям супраць Беларусі.
Для бізнессу арганізуюць "адкрытыя прыёмныя" па абмеркаванні актуальных і праблемных пытанняў развіцця суб'ектаў малога і сярэдняга прадпрымальніцтва, будзе падтрымлівацца стартап-рух.
У Год народнага адзінства хочуць правесці першы форум паспяховых бацькоў, кангрэс жанчын, шэраг спартыўна-масавых і фізкультурна-аздараўленчых мерапрыемстваў, мерапрыемстваў для развіцця медыяграматнасці і медыябяспекі. Частка мерапрыемстваў будзе прысвечана добраўпарадкаванню населеных пунктаў.-0-

Навіны Беларусі (БЕЛТА)

Да спіса