У Беларусі з 1 лютага павышаецца бюджэт пражытачнага мінімуму

1 лютага, Мінск /Кар. БЕЛТА/. У Беларусі з 1 лютага павялічваюцца памеры бюджэту пражытачнага мінімуму. Новы памер БПМ будзе дзейнічаць па 30 красавіка 2024 года, паведамілі БЕЛТА ў прэс-службе Міністэрства працы і сацыяльнай абароны.

Як стала вядома, БПМ у сярэднім на душу насельніцтва ў параўнанні з яго значэннем, устаноўленым з 1 лістапада 2023 года, павялічыцца на 10,6 працэнта і складзе Br406,74.

Па асноўных сацыяльна-дэмаграфічных групах зацверджаны наступныя памеры БПМ: працаздольнае насельніцтва - Br434,60; пенсіянеры - Br298,43; дзеці ва ўзросце да трох гадоў - Br260,39; дзеці ва ўзросце ад трох да шасці гадоў - Br349,90; дзеці ва ўзросце ад шасці да васямнаццаці гадоў - Br406,30.

У Мінпрацы адзначылі, што рост гэтага сацыяльнага нарматыву абумоўлены ў першую чаргу змяненнем якаснага складу мінімальнага набору прадуктаў харчавання, што ўваходзіць у пражытачны мінімум, зацверджаным рашэннем урада ад 9 кастрычніка 2023 года нумар 666.

Змяненні закранаюць каля 1,5 млн атрымальнікаў сацыяльных выплат, устаноўленых ад БПМ.

У сувязі са змяненнем БПМ аўтаматычна пераглядаюцца ўбудаваныя ў сістэму сацыяльнай абароны асобныя сацыяльныя выплаты. Гэта памеры дзяржаўных дапамог сем'ям, якія выхоўваюць дзяцей, даплаты да пенсій, дапамогі па догляду інваліда І групы або асобы, якая дасягнула 80-гадовага ўзросту і сацыяльныя пенсіі.-0-

БЕЛТА - Навiны Беларусi