Як пройдзе акцыя "Нашы дзеці", расказала старшыня праўлення Беларускага дзіцячага фонду

6 снежня, Мінск /Кар. БЕЛТА/. Дырэктар Рэспубліканскага рэабілітацыйнага цэнтра для дзяцей-інвалідаў, старшыня праўлення Беларускага дзіцячага фонду Людміла Кандрашова ў новым выпуску праекта "Краіна гаворыць" на YouTube-канале БЕЛТА расказала, як пройдзе навагодняя дабрачынная акцыя "Нашы дзеці", якая праводзіцца ў Беларусі з 15 снежня па 15 студзеня 2023 года.

"Асноўным пасылам акцыі ў бягучым годзе стане дапамога хворым дзецям, дапамога дзецям з аўтызмам. Усе нашы абласныя прадстаўніцтвы ўжо ўключыліся ў падрыхтоўку для таго, каб да кожнага дзіцяці, якое мае патрэбу ў клопаце і цяпле, у Новы год прыйшоў Дзед Мароз. Побач з гэтымі дзецьмі мы самі вяртаемся ў дзяцінства. А дарыць нават радасней, чым атрымліваць падарункі", - расказала Людміла Кандрашова.

Ва ўсіх рэгіёнах краіны дабрачынная акцыя пройдзе з падтрымкай валанцёраў, прадстаўнікоў сферы адукацыі, вышэйшых навучальных устаноў, студэнтаў. "Мы ідзём да дзяцей з навагоднімі паказамі, клоўнамі, падарункамі. Дапамагаць жа вельмі проста, проста рабіць добрыя справы, не адкладваючы іх на потым. Мы спадзяёмся, што краіна нас пачуе, і мы разам зробім гэтыя навагоднія дні для нашых дзяцей больш радаснымі і шчаслівымі", - сказала на заканчэнне кіраўнік.

Праект створаны за кошт сродкаў мэтавага збору на вытворчасць нацыянальнага кантэнту.-0-

Навіны Беларусі (БЕЛТА)