Аперацыі па транскатэтарным эндапратэзаванні мітральнага клапана ўпершыню правялі ў Беларусі

У РНПЦ "Кардыялогія" ўпершыню ў Беларусі правялі дзве аперацыі па транскатэтарным эндапратэзаванні мітральнага клапана па методыцы "клапан-у-клапан", паведамляе БЕЛТА са спасылкай на РНПЦ.

Раней аналагічная аперацыя праводзілася з выкарыстаннем хірургічнага доступу праз верхавінку сэрца. На гэты раз доступ да мітральнага клапана ажыццяўляўся поўнасцю эндаваскулярна, праз пункцыю сцегнавой вены і міжперадсэрдзевую перагародку. Гэта методыка прызначана для раней аперыраваных пацыентаў, якім быў імплантаваны біялагічны пратэз мітральнага клапана. Пры развіцці стэнозу і/або недастатковасці клапаннага біяпратэза паўторнае аперацыйнае ўмяшанне звязана з высокай рызыкай ускладненняў.

Першая прааперыраваная пацыентка, жанчына 80 гадоў, тройчы пераносіла аперацыйныя ўмяшанні на адкрытым сэрцы - мітральную камісуратамію ў 1976 годзе, біяпратэзаванне мітральнага і аартальнага клапанаў у 2008 годзе і рэпратэзаванне аартальнага клапана ў 2019-м. У сувязі з развіццём значнага стэнозу і недастатковасцю IV ступені на мітральным біяпратэзе было вырашана правесці транскатэтарную імплантацыю мітральнага клапана. У ходзе ўмяшання ў мітральную пазіцыю быў імплантаваны біялагічны пратэз Edwards Sapien 3.

Другі пацыент - мужчына 77 гадоў, які перанёс у 2016 годзе біяпратэзаванне мітральнага клапана. Да цяперашняй аперацыі ў яго развілася недастатковасць мітральнага клапана IV ступені. Пацыенту таксама выканана транскатэтарная імплантацыя біялагічнага пратэза Edwards Sapien 3.

Спецыялісты адзначылі, што абедзве аперацыі прайшлі без ускладненняў. У пасляаперацыйным перыядзе стан пацыентаў здавальняючы, яны прадаўжаюць лячэнне ў цэнтры.

Умяшанні выкананы супрацоўнікамі РНПЦ "Кардыялогія" Алегам Паланецкім, Валерыем Сельмашкам, Аленай Курлянскай, Андрэем Зацэпіным, Людмілай Сапун, Аленай Анчыкавай, Ірынай Татарыцкай. Кансультацыйная дапамога ажыццяўлялася доктарам Рафаэлем Вольфам (Іерусалім, Ізраіль) па відэасувязі і клінічным спецыялістам кампаніі Edwards Lifescience Робертам Харысавым (Масква, РФ).-0-

БЕЛТА - Навiны Беларусi