Сур'ёзная размова па-мужчынску. Лукашэнка патрабуе пераламаць негатыўныя тэндэнцыі ў Гомельскай вобласці

25 лістапада, Гомель /Кар. БЕЛТА/. Пераламаць негатыўныя тэндэнцыі ў рабоце Гомельскай вобласці можна толькі напружанай працай. Аб гэтым Прэзідэнт Беларусі Аляксандр Лукашэнка заявіў на нарадзе па развіцці аграпрамысловага комплексу Гомельскай вобласці, перадае карэспандэнт БЕЛТА.

"Задачы застаюцца ранейшыя, складаныя. З'яўляюцца новыя выклікі. Вы ў Гомельскай вобласці гэтыя выклікі адчуваеце на сабе больш, чым хто-небудзь у Беларусі. Але, нягледзячы на гэта, у нас сёння сур'ёзная і дзелавая размова з кіраўніцтвам і актывам нашай вобласці. Як я разумею, тут сабраліся тыя, хто мае адносіны да аграпрамысловага комплексу Гомельшчыны. І не толькі, напэўна. Такое было маё даручэнне. Хачу адразу папярэдзіць: размова будзе сур'ёзная. Таму ўспрымайце яе па-мужчынску і без крыўд", - пачаў нараду Аляксандр Лукашэнка.

Кіраўнік дзяржавы адзначыў, што быў вымушаны загадзя анансаваць свой візіт у Гомель, каб на месцы дэталёва разабрацца са станам спраў у аграпрамысловым комплексе. "У вас быў час для таго, каб падрыхтавацца, сёння далажыць, і нам усім разам вызначыцца, як мы будзем рухацца далей. Кожны з вас пасля гэтай сустрэчы павінен вярнуцца ў свой раён, у сваю гаспадарку, каб працаваць вельмі-вельмі шмат і напружана. З поўнай самааддачай. І будзе патрабаваць таго ж ад падначаленых. Па-іншаму пераламаць негатыўныя тэндэнцыі ў рабоце рэгіёна не атрымаецца", - падкрэсліў Прэзідэнт.

Пра стаўку на сельскую гаспадарку
"Мы пастаянна гаворым пра важнасць харчовай бяспекі і сельскагаспадарчай галіны. Магчыма, камусьці гэта ўжо нагнала аскому. Але ў тым, што мы мелі рацыю, зрабіўшы стаўку на вытворчасць прадуктаў харчавання, пераканаліся і ў Беларусі, і за яе межамі, - адзначыў Аляксандр Лукашэнка. - У гэтым годзе ўся наша краіна ўпрэглася, як я гавару, закасаўшы рукавы і выдала дастойны вынік".

Прэзідэнт нагадаў, што гэтымі днямі прыняў удзел у саміце АДКБ, які адбыўся ў Арменіі. На пасяджэнні кіраўнікі дзяржаў у першую чаргу абмяркоўвалі ваенна-палітычнае супрацоўніцтва. "Без пытанняў харчовай бяспекі ніводнага выступлення. Усе кіраўнікі дзяржаў гаварылі менавіта аб гэтым. Гэта сведчыць аб тым, што ў свеце вельмі сур'ёзнае становішча з прадуктамі харчавання. І ўсё гэта будзе нарастаць. Каму гэта выгадна, хто выгадаатрымальнікі, вам таксама тлумачыць не трэба, вы гэта цудоўна разумееце", - заўважыў беларускі лідар.

Пра дасягнутыя (або недасягнутыя) вынікі
У Мінскай вобласці сабралі больш за 2 млн т збожжа, па 1,5 млн т - у Гродзенскай і Брэсцкай абласцях. Мільён перасягнулі Віцебск і Магілёў. Пры гэтым задача для цэнтральнага рэгіёна на наступны год - дасягнуць трохмільённага ўзроўню па зборы збожжавых, заявіў кіраўнік дзяржавы.

"Які пры гэтым уклад Гомельшчыны ў агульны каравай? На жаль, ганарыцца няма чым. Мільённы рубеж мы пераадолелі тут толькі з улікам кукурузы. А што па мясе, малаку? Уся краіна рухаецца ўверх, а вы - уніз", - адзначыў Прэзідэнт.

Як мне дакладваюць, калі б Гомельская вобласць дасягнула хаця б узроўню мінулага года, то Беларусь у сельскай гаспадарцы выканала б пастаўленую задачу па росце да 104 працэнтаў. "Спадзеяцеся, што за лістапад-снежань пойдзе рост па ўсіх паказчыках? Або іншыя рэгіёны будуць узмоцнена за вас працаваць? З-за такога падыходу гомельскага аграпрама ўпушчаная выгада склала прыкладна 100 мільёнаў рублёў. Грошы немалыя. Асабліва сумна, што правальная сітуацыя не толькі ў гэтым годзе", - канстатаваў Аляксандр Лукашэнка.

За апошнія 5 гадоў сельскагаспадарчая вытворчасць у вобласці знізілася больш як на 13 працэнтаў. У той час як у цэлым па краіне забяспечаны рост на 4 працэнты. "Усе адгаворкі я ведаю загадзя - надвор'е (то засуха, то дажджы), бальнасць зямлі нізкая (то пясок, то вецер, то яшчэ якая-небудзь зараза). Хачу сказаць: не толькі вы наракаеце на гэтыя акалічнасці. Усюды аб гэтым гавораць. Але не ўсюды такі вынік, дакладней, яго адсутнасць, як у Гомельскай вобласці. Я зямны чалавек і разумею, як вы, што ёсць аб'ектыўныя акалічнасці, якія не залежаць ад нас. Ёсць такія фактары. Але ці ўлічваюць на Гомельшчыне мясцовыя асаблівасці саставу глебы, ці ўмеюць прыстасоўвацца да кліматычных умоў? Гэта ж не нечакана на нас наваліліся гэтыя кліматычныя ўмовы, мы ж гэта бачылі даўно. Наколькі аператыўна прымаюцца рашэнні па пераходзе да аптымальнай структуры пасяўных плошчаў?" - спытаў Прэзідэнт.

Пра чалавечы фактар
Кіраўнік дзяржавы таксама пацікавіўся меркаваннем вучоных-аграрнікаў аб рэзервах вобласці і ці прытрымліваюцца ў рэгіёне гэтых рэкамендацый, якія меры прыняты, якія не і чаму. "Вучоныя сёння павінны дакладна сказаць: вось гэты напрамак мы рэкамендуем для Гомельскай вобласці, ён правераны на практыцы, яму быць. А проста лекцыю прачытаць - нам такія вучоныя сёння ў гэтай зале не патрэбны. Лекцый мы наслухаліся, патрэбна практыка", - звярнуў увагу Аляксандр Лукашэнка.

"Акрамя таго, як ідуць справы з тым, на што ўплывае выключна чалавечы фактар? У выкананні тэхналогій, унясенні ўгнаенняў, структуры пасеваў, недапушчэнні падзяжу жывёлы, падрыхтоўцы, захаванасці сельгастэхнікі. Перш чым аб вялікім марыць, трэба ўзяць тое, што на паверхні. А гэта звязана з чалавечым фактарам. Нават у элементарным - у працоўнай і выканальніцкай дысцыпліне і прытрымліванні літары закону", - падкрэсліў Прэзідэнт.

Практычна ва ўсіх правяраемых гаспадарках выяўляюцца парушэнні пры гадоўлі жывёлы. У кожнай чацвёртай устаноўлены факты прадастаўлення недакладнай інфармацыі аб яе падзяжы. Трэць арганізацый дапускае парушэнні тэхналогіі закладкі кармоў. "На месцах бардак, хранічныя прыпіскі і крадзеж. Любое скажэнне статыстыкі - гэта няправільна прынятае рашэнне. Гэта катастрафічныя памылкі не толькі для Гомельскай вобласці, але і для краіны ў цэлым. Таму любая ваша статыстычная справаздачнасць - важнейшы элемент у кіраванні дзяржавай. Я наогул не разумею, навошта вы хлусіце. Каму патрэбна гэта хлусня? Гэта ж лёгка праверыць", - заявіў кіраўнік дзяржавы.

"Калі я прымаў рашэнне аб накіраванні да вас міністра сельскай гаспадаркі (Івана Крупко. - Заўвага БЕЛТА), думаў: прыедзе, жалезнай рукой навядзе парадак. Перш за ўсё ў сельскай гаспадарцы. Да таго ж гэта кіраўнік ад зямлі. Працаваў і ў гаспадарцы, паспяховыя раёны Міншчыны ўзначальваў, затым міністрам працаваў. Ёсць усё неабходнае: і вопыт, і кампетэнцыі. Ёсць веды. Што вам яшчэ трэба? Якога лепшага кіраўніка я магу сюды накіраваць? Значыць, многае залежыць ад вас. Як вы вакол яго станеце і будзеце цягнуць гэты цяжар", - звярнуў увагу Аляксандр Лукашэнка.

Пра свабоду і незалежнасць
"Паверце, час вельмі сур'ёзны: або мы застаёмся дзяржавай, або нам трэба думаць аб іншых варыянтах - але гэта ўжо без мяне. Мы не дарэмна 30 гадоў песцілі і няньчылі сваю дзяржаву для таго, каб хаця б нашы дзеці жылі свабодна, незалежна. Калі хтосьці разумее гэту свабоду і незалежнасць (гэта не вас датычыцца, а нашага народа), што "я што хачу, тое і варачу" - хачу працую, хачу не - ні ў адной дзяржаве гэтага няма і не будзе. Свабода і незалежнасць - гэта магчымасці", - падкрэсліў Аляксандр Лукашэнка.

Прэзідэнт адзначыў, што ў яго не было багатых сваякоў, ён рос у вельмі цяжкія гады. І тады людзі (дарослыя, і мая маці) марылі аб тым, каб сын, дзеці атрымалі дастойную адукацыю, каб яны мелі роўныя ўмовы з дзецьмі міністраў, палкоўнікаў, генералаў, прафесараў, акадэмікаў і гэтак далей. Мы што гэтага людзям не далі? Далі. Нават больш таго. Разумеючы, што ў вёсцы складаней сёння і з адукацыяй, і іншае, колькі мы ў ВНУ ўвялі па мэтавых накіраваннях адукацыю? Ідзіце - калі ласка, вучыцеся. Такога ў Савецкім Саюзе не было. Мы з глыбінкі, асабліва з Гомельскай вобласці, так званых чарнобыльскіх раёнаў, яшчэ больш падтрымліваем дзетак", - сказаў кіраўнік дзяржавы.

"Што яшчэ трэба? Хочаце пад бізуном чыім-небудзь пахадзіць, пахОдзіце. Але тады з вамі размаўляць вось у такім складзе ніхто не будзе. Возьмуць бізун, і будзеце бегчы наперадзе. Скапыцецеся, як у народзе кажуць, адстанеце, вы ведаеце, што будзе. З намі гэта было ўжо 80 гадоў таму: нам спрабавалі гэта прадэманстраваць. І па Беларусі прайшліся так, што мы да гэтага часу чхаем. Менавіта так востра сёння стаіць пытанне. І вы ў Гомельскай вобласці гэта адчулі: гэта тут побач з вамі. Дык гэта проста душок панюхалі. Не хочацца, каб нашы дзеці ўзялі ружжо і пайшлі абараняць сваю краіну. Мне гэтага абсалютна не хочацца. Калі некаму з вас хочацца, устаньце і скажыце - мы забяспечым. Таму лепш давайце мы з вамі сціснуўшы зубы будзем працаваць і выдаваць вынік", - запатрабаваў Аляксандр Лукашэнка.

Пра лакмусавую паперку для Гомельскай вобласці
"Я хачу проста вас усіх папярэдзіць: надыходзячы 2023 год - гэта для вас лакмусавая паперка. Або вы зможаце нешта зрабіць, або мне давядзецца думаць, што рабіць з Гомельскай вобласцю. Далей жыць так нельга, і мы не будзем так жыць. Гэта дакладна", - падкрэсліў кіраўнік дзяржавы.

"У мяне ёсць, вядома, варыянты: што зарабілі, тое і атрымаеце. І мы да гэтага будзем вас падводзіць. Я не магу браць з іншых галін грашовыя рэсурсы і перакідваць у Гомельскую вобласць. Таму думайце, як вы будзеце жыць, зарабляць для таго, каб дастойна выглядаць", - паставіў задачу Прэзідэнт.

Пра момант ісціны
Кіраўнік дзяржавы звярнуў увагу, што цяпер у сельскай гаспадаркі ўнікальныя магчымасці. Попыт на прадукцыю вялікі, цэны высокія. Для Беларусі, якая ў гэтым годзе сабрала рэкордны ўраджай, сітуацыя складваецца вельмі дарэчы. "Бог нас пашкадаваў, і сёлета мы сапраўды выдалі ў краіне цудоўны вынік у сферы аграпрамысловага комплексу. Раней мы не ведалі, што рабіць, куды прадаць. Сёння толькі дай. За добрыя грошы. Дык прадайце, вазьміце грошы і рабіце ў Гомельскай вобласці. "Вам ніхто не перашкаджае, а я буду вас толькі абараняць, каб вам ніхто не перашкаджаў. Але вы зарабіце гэтыя грошы", - паставіў задачу Прэзідэнт.

"Вы чамусьці думаеце, што будзе і далей так. Момант ісціны цяпер. Рынкі - вязі куды хочаш, толькі дай. І не толькі ў Расіі. Кітай гатовы спажыць колькі хочаце прадукцыі", - падкрэсліў Аляксандр Лукашэнка.

Пры гэтым кіраўнік дзяржавы заўважыў, што, як яго інфармуюць, дылеры вельмі сур'ёзна нажываюцца на беларускіх таварах: закупляюць на прадпрыемствах за ўмоўныя два рублі, а прадаюць у Расіі за дзевяць. Прэзідэнт патрабуе, каб прадпрыемствы развівалі свае гандлёвыя сеткі і самастойна займаліся продажамі, а не проста імкнуліся як мага хутчэй выпіхнуць прадукцыю за свае вароты. "Мы з гэтым будзем разбірацца і вас абараняць, але і вам трэба варушыцца, каб дастойна выглядаць і мець грошы. Сёння можна атрымаць грошы", - упэўнены Прэзідэнт.

Кіраўнік дзяржавы папярэдзіў, што нічога бясплатна не бывае і не будзе: і за тэхніку, і за меліярацыю Гомельскай вобласці давядзецца заплаціць. "І цяпер шанц. Таму вы думалі перад прыездам Прэзідэнта сюды, як будзеце жыць і працаваць, думаю, што прыдумалі. Тое, што недадумалі, пасля нашай размовы да вясны вы прыдумаеце, зыходзячы з рэальнай абстаноўкі. І не забывайце, што зімоўка - гэта старт будучага года. Калі вы праваліце ​​зімоўку, тады не трэба будзе марыць, як мне міністр дакладваў, аб 30-працэнтным росце ў будучым годзе ў сферы раслінаводства і 18-20 працэнтах у жывёлагадоўлі. Зімоўку праваліць нельга", - падкрэсліў Аляксандр Лукашэнка.

Пра кадры і дысцыпліну
Прэзідэнт нагадаў, што заўсёды патрабуе ад новых кіраўнікоў на месцах не сячы з-за пляча, даваць шанц работнікам. Але калі вынікаў няма, трэба прымаць кадравыя рашэнні. Для тых, хто проста не на сваім месцы, трэба знайсці новую работу, але па тых, хто паводзіць сябе варожа, трэба прымаць жорсткія рашэнні, звярнуў увагу кіраўнік дзяржавы.

Нядаўна аблвыканкамам даручалася выпрацаваць сістэму кадравай палітыкі. "Працуеш - вось табе ўсе даброты, павага, гонар і слава. Калі ты не хочаш працаваць - мы паспрабуем цябе навучыць і прымусіць. Калі зусім няздольны - адыходзьце ўбок, бярыце мятлу і мяціце, - сказаў Аляксандр Лукашэнка. - Без дысцыпліны і парадку, тэхналагічнай дысцыпліны няма пра што гаварыць".

Трэба прымаць кадравыя рашэнні, якія забяспечвалі б паступальны рух рэгіёна наперад, запатрабаваў Прэзідэнт. "Нядаўна да таго ж назначаны новыя кіраўнікі шэрага раёнаў Гомельшчыны. Спадзяюся, людзі будуць працаваць як трэба", - дадаў ён.

"Што да нашага сённяшняга мерапрыемства, не трэба ад яго чакаць нечага жахлівага. Так, гэта сур'ёзная размова. Галоўнае ў наступным: больш угавораў, размоў з гамяльчанамі (гэтак жа, як з магіляўчанамі, віцябчанамі) не будзе. Вы ведаеце, што рабіць. Вы вызначыліся. І галоўнае - варушыцеся, дзейнічайце. Не разлічвайце, што вам нехта дасць грошы ці нехта вам купіць трактар ​​новы або аўтамабіль, калі ў вас няма машыннага двара, - заявіў кіраўнік дзяржавы. - Патрэбны сёння план, дзе будзе дэталёва прапісана ўсё да дробязей: мерапрыемствы, адказныя, тэрміны і рэсурсы. План развіцця аграпрамысловага комплексу Гомельскай вобласці, як і па іншых абласцях".

"Але яшчэ раз гавару: парадак, дыктатура тэхналагічная, дысцыпліна. Кожны кіраўнік гаспадаркі, кожны работнік мясцовай вертыкалі павінен дакладна разумець сваю ролю, месца і адказнасць. Толькі так мы можам атрымаць вынік. Лічыце, што я сказаў усё. Жалезабетонна. Я вельмі хачу, каб вы, пачуўшы мяне, зразумелі", - рэзюмаваў Аляксандр Лукашэнка.-0-

Навіны Беларусі (БЕЛТА)