"Гомсельмаш" паставіць у Казахстан абноўленыя збожжаўборачныя камбайны

25 верасня, Астана /кар. БЕЛТА/. "Гомсельмаш" паставіць у Казахстан абноўленыя збожжаўборачныя камбайны. Аб гэтым карэспандэнту БЕЛТА паведаміў першы намеснік дырэктара па рэалізацыі і развіцці - дырэктар цэнтра продажаў і сэрвісу "Гомсельмаша" Дзмітрый Афанасьеў на палях Міжнароднага прамысловага форуму "ІНАПРАМ. Казахстан", які праходзіць у Астане з 25 па 27 верасня.

З мэтай развіцця прамысловай кааперацыі ў Казахстане створана сумесная зборачная вытворчасць тэхнікі "Гомсельмаша". "У Казахстане ажыццяўляецца сумесная зборка збожжаўборачных камбайнаў пад гандлёвай маркай Essil. Гэта вельмі паспяховы праект, мы збіраем 4,3 тыс. адзінак збожжаўборачных камбайнаў", - расказаў Дзмітрый Афанасьеў.

"На "ІНАПРАМе" мы прадставілі прадукцыю, якую збіраем у Казахстане. Цяпер узровень лакалізацыі даходзіць ужо да 40 працэнтаў. Цалкам лакалізаваны жняяркі, нахільныя камеры, бункеры. Працэс ідзе пастаянна, - адзначыў ён. - Мы плануем падпісаць пагадненне аб пастаўках у 2024 годзе новага віду абноўленага камбайна 4-га класа".

Холдынг "Гомсельмаш" - адзін з буйнейшых вытворцаў сельскагаспадарчай тэхнікі, які ўваходзіць у лік лідараў сусветнага рынку камбайнаў і іншых складаных сельгасмашын. Прадпрыемства выпускае мадэльныя рады збожжаўборачных і кормаўборачных камбайнаў, пачаткаўборачныя і бульбаўборачныя камбайны, касілкі і іншую сельгастэхніку. Камбайны "Гомсельмаша" працуюць на палях Расіі, Казахстана, Аргенціны, Бразіліі, Кітая, Рэспублікі Карэя і іншых краін. Кампанія мае шырокую тавараправодную сетку, сумесныя прадпрыемствы і зборачныя вытворчасці.

Міжнародны прамысловы форум "ІНАПРАМ. Казахстан" праходзіць у Астане з 25 па 27 верасня. У ліку ўдзельнікаў выстаўкі і Беларусь. Нацыянальная экспазіцыя краіны размясцілася на плошчы 742 кв.м (210 кв.м - у павільёне, 532 кв.м - на вулічнай пляцоўцы). У ліку прадпрыемстваў, якія прадстаўляюць сваю прадукцыю і тэхналогіі - падначаленыя арганізацыі Мінпрама: МАЗ, "БКМ Холдынг", "Гомсельмаш", "Магілёўліфтмаш", БАТЭ, БМЗ, Мінскі электратэхнічны завод, "Атлант", "Гарызонт", "Інтэграл". 

Таксама ў Астане прысутнічаюць арганізацыі і ўстановы НАН Беларусі, ДКНТ і Мінадукацыі (аб'яднаны стэнд: прыборабудаўнічы завод "Аптрон", Аб'яднаны інстытут праблем інфарматыкі НАН Беларусі, Мінскі навукова-даследчы інстытут радыёматэрыялаў, Авіяцыйныя тэхналогіі і комплексы, Цэнтр сістэмнага аналізу і стратэгічных даследаванняў НАН Беларусі, БДУ, БДТУ і БДУІР). У ліку ўдзельнікаў беларускай экспазіцыі таксама і прадпрыемствы канцэрна"Беллегпрам". 

На выстаўцы "ІНАПРАМ. Казахстан" свае экспазіцыі прадстаўляюць 4 краіны: арганізатары Казахстан і Расія, госці - Арменія і Беларусь. Чакаецца, што міжнародны прамысловы форум наведаюць бізнес-дэлегацыі з 20 краін свету.-0-

БЕЛТА - Навiны Беларусi