Агрэгаты павінны быць адрамантаваны да 1 сакавіка: у Гомельскай вобласці сельскагаспадарчая тэхніка для правядзення веснавых палявых работ гатовая на 88%
Працягваецца рамонт сельгасагрэгатаў. Пытанне абмеркавалі на нарадзе пад старшынствам губернатара Івана Крупко.
У рамонце знаходзіцца звыш тысячы адзінак: трактары, у тым ліку энерганасычаныя, плугі, дыскатары, сеялкі і іншая тэхніка. Дэфектоўка па кожнай адзінцы праведзена, сродкі выдзелены. Пралічаны тэрміны правядзення работ у кожнай гаспадарцы.
– Да 1 сакавіка ўся тэхніка павінна быць гатовая, у кожным раёне павінен быць складзены штодзённы план, ад якога нельга адступаць. Прапрацуйце гэта пытанне дэталёва, – паставіў канкрэтную задачу старшыня аблвыканкама.
Асаблівую ўвагу трэба надаць рамонту энерганасычаных трактароў, паколькі падчас пасяўной на іх будуць выконвацца асноўныя сельгасработы. На гэтым зрабіў акцэнт Іван Крупко. Аднак гэта не падстава адкладаць аднаўленне іншых агрэгатаў, падкрэсліў старшыня аблвыканкама.
– Не зацягвайце таксама з правядзеннем тэхагляду адрамантаванай тэхнікі. Перашкод для яго праходжання няма. Неабходна, каб дакументы былі аформлены да канца лютага. Гэта найперш бяспека, – падкрэсліў губернатар.
Удзел у нарадзе прыняў памочнік Прэзідэнта – інспектар па Гомельскай вобласці Юрый Горлаў.
