ВЫКАНАЎЧЫ КАМІТЭТ
Рэдакцыі рэгіянальных медыя павінны не толькі аператыўна сачыць за інфармацыйным парадкам дня, але і працаваць на апярэджанне, самастойна прапаноўваць інфанагоды, праяўляць ініцыятыву. Аб гэтым заявіў кіраўнік Адміністрацыі Прэзідэнта Ігар Сергяенка 19 снежня на нарадзе аб стане і эфектыўнасці работы рэгіянальных сродкаў масавай інфармацыі па рэалізацыі дзяржаўнай інфармацыйнай палітыкі, перадае карэспандэнт БЕЛТА.
Пры падрыхтоўцы да нарады быў праведзены маніторынг рэгіянальных СМІ ва ўсіх абласцях краіны, які паказаў, што за апошні год такія медыя прыбавілі ў развіцці. Сукупны тыраж рэгіянальнай прэсы трымаецца на высокім узроўні - 700 тыс. экзэмпляраў. На 67 працэнтаў вырасла іх аўдыторыя ў сацыяльных сетках і мэсэнджарах. Прыкметна абнавіўся газетны дызайн, палепшылася якасць журналісцкіх матэрыялаў, узмоцнена работа з рэгіянальным і рэспубліканскім парадкамі дня, укаранёны сучасныя формы зваротнай сувязі з чытачамі, забяспечаны рост заработнай платы, створаны больш камфортныя ўмовы работы для супрацоўнікаў.
Па выніках вывучэння сітуацыі зроблена выснова, што стратэгія па ўзбуйненні асобных рэдакцый своечасовая і дае пэўны станоўчы вынік.
Ігар Сергяенка на нарадзе звярнуў увагу не толькі на пазітыўныя прыклады работы рэдакцый рэгіянальных медыя, але ў першую чаргу зрабіў акцэнт на недахопах, якія патрабуюць прыняцця аператыўных мер. Асноўныя з іх - гэта дэфіцыт кадраў, слабая матэрыяльна-тэхнічная база, недастатковая работа ў інтэрнэце. Многія рэгіянальныя выданні размяшчаюць на сваіх сайтах рэпосты, а не ўнікальны аналітычны кантэнт. Як вынік - зніжэнне ахопу чытацкай аўдыторыі. "Ёсць выпадкі, калі патэнцыял гэтай работы ігнаруецца ў медыяполі вялікіх рэгіёнаў", - заўважыў кіраўнік Адміністрацыі Прэзідэнта.
Ён падкрэсліў, што рэгіянальныя газеты абавязкова павінны ўдзяляць увагу мясцоваму парадку дня, закранаць праблемныя пытанні, пісаць аб развіцці інфраструктуры рэгіёна. Толькі такім чынам яны змогуць прыцягнуць аўдыторыю і быць цікавымі людзям. "Не чакайце, пакуль людзі вынесуць інфармацыю ў публічную плоскасць і гэта атрымае шырокі грамадскі рэзананс, - сказаў кіраўнік Адміністрацыі Прэзідэнта. - Мы павінны працаваць на апярэджанне. Не толькі аператыўна адсочваць, але і самастойна прапаноўваць інфармацыйны парадак дня, праяўляць ініцыятыву і не забываць пра сваю аўдыторыю".