Інавацыі, спартыўны і культурны фэсты: у Гомельскай вобласці далі старт Тыдню моладзі

21 чэрвеня, Гомель /Кар. БЕЛТА/. Маладзёжны тыдзень стартаваў 20 чэрвеня ў Гомельскай вобласці, паведамілі карэспандэнту БЕЛТА ў абкаме БРСМ.

Кожнаму дню тыдня моладзі і студэнцтва прысвоены тэматычны статус. "Гэтыя мэтавыя акцэнты пакажуць розныя грані нашай актыўнай, спартыўнай, творчай, спагадлівай, глыбакадумнай моладзі, якая захоўвае памяць. Радасна, што маладзёжную палітыку заўсёды падтрымлівае кіраўнік дзяржавы", - расказала першы сакратар Гомельскага абкама БРСМ Вераніка Гудкова.

Так, 21 чэрвеня - дзень навукі - пройдзе пад дэвізам "Моладзь за навуку". Азнаёміцца з праектамі гомельскіх інаватараў дасць магчымасць перасовачная выстаўка "100 ідэй для Беларусі".

У Дзень усенароднай памяці ахвяр Вялікай Айчыннай вайны і генацыду беларускага народа - 22 чэрвеня моладзь рэгіёна пераадолее "Кіламетры Перамогі" ў час велапрабегу па памятных мясцінах.

Тэматыка наступнага дня - спорт. У Жыткавічах самых актыўных збярэ квест-гульня Crossfit, а 24-26 чэрвеня ў вёсцы Шыхаў Жлобінскага раёна пройдзе маладзёжны фестываль культуры і спорту "Сварог".

Бліжэйшая субота пройдзе пад знакам дабра. На ваенна-гістарычным комплексе "Партызанская крынічка" адбудзецца міжканфесійная дабрачынная акцыя "Аднаўленне святынь Беларусі. Нас аб'ядноўвае гісторыя і вера".

Фіналам тэматычнага тыдня ў нядзелю стане гарадскі фестываль маладзёжных культур "Моладзь-фэст" у Гомелі.

Тыдзень моладзі і студэнцтва Moladz.by праходзіць у Беларусі з 20 па 26 чэрвеня пад слоганам "Moladz.by: помнім традыцыі, жывём цяперашнім, імкнёмся ў будучае". Гэта новы фармат тэматычных мерапрыемстваў, які нацэлены на павышэнне статусу студэнцкай моладзі і яе ролі ў жыцці грамадства і дзяржавы.-0-